Xalq şairi Zəlimxan Yaqubun 13 cildlik külliyyatının təqdimatı keçirilib

2013-cü il sentyabrın 24-də III Bakı Beynəlxalq Kitab-Sərgi Yarmarkası çərçivəsində Xalq şairi Zəlimxan Yaqubun 13 cildlik külliyyatının təqdimatı keçirildi.

Ədəbiyyat və incəsənət nümayəndələrinin, geniş oxucu kütləsinin iştirak etdiyi təqdimat mərasimini coxcildliyin nəşr olunduğu “Şərq-Qərb” Nəşriyyat Evinin direktor müavini Rafiq Kazımov açdı. Çoxcildliyin tərtibçisi və redaktoru Musa Nəbioğlu şairin yaradıcılığı  və təqdim olunan çoxcildlik haqqında tədbir iştirakçılarına geniş məlumat verdi. O, qeyd etdi ki,  Xalq şairinin 13 cildlik külliyyatının I-VII cildlərində şeirlər, VIII-XI cildlərdə isə müxtəlif illərdə yazılmış 40 poema yer alıb. Külliyyatın XII-XIII cildlərində Zəlimxan Yaqubun ictimai-siyasi və dövlət xadimlərinə məktubları, rəsmi dövlət tədbirlərindəki çıxışları, kütləvi informasiya vasitələrinə verdiyi müsahibələr, görkəmli ədəbiyyat və sənət adamlarına açıq məktubları, onlar haqqında xatirələri, ayrı-ayrı müəlliflərin kitablarına yazdığı ön söz və rəylər, aşıq sənəti ilə bağlı düşüncələri və s. yazıları çap olunub.

Tədbirdə Əməkdar artist Ağalar Bayramov Zəlimxan Yaqubun şeirlərini səsləndirdi, gənc aşıq Ramin Qarayev şairin sözlərini oxudu. Cənubi Azərbaycandan gəlmiş İbrahim Şərifzadə, gənc şairlər Anar Amin və Təbriz İman çıxış edərək şairə ithaf etdikləri şeirlərini oxudular.

Sonda Xalq şairi Zəlimxan Yaqub çıxış edərək 13 cildlik əsərləri külliyyatını nəfis tərtibatla nəşr edən “Şərq-Qərb” Nəşriyyat Evinin rəhbərliyinə, nəşrin çapında zəhməti olan hər kəsə və təqdimat mərasiminə qatılanlara minnətdarlığını bildirdi, yeni şeirlərini söylədi və oxucularına kitablarını avtoqrafla bağışladı.

Elşad Çobanlı