USTAD AŞIQ KAMANDAR HAQQINDA YENİ KİTAB

Azərbaycan Aşıqlar Birliyinin layihəsi olan “Ustad aşıqlarımız” seriyasından yeni kitab işıq üzü görüb. Kitab Borçalı aşıq məktəbinin yetirməsi, XX əsrdə aşıq sənətinin inkişafında müstəsna xidmətləri olan və hələ sağlığında ikən klassikləşən, Azərbaycanın Əməkdar Mədəniyyət işçisi  Aşıq Kamandar Əfəndiyevə həsr olunub. Kitabda ədəbiyyat və incəsənət xadimlərinin, ictimai-siyasi xadimlərin, folklorşünas alimlərin və sənət dostlarının ustadla bağlı xatirələri, müxtəlif illərdə barəsində mətbuatda yazılan yazılar, müsahibələri və ona ithaf olunmuş şeirlər yer alıb.

“Elm və təhsil” nəşriyyatında nəfis tərtibatla işıq üzü görmüş kitabın məsləhətçisi və redaktoru Xalq şairi, Azərbaycan Aşıqlar Birliyinin sədri Zəlimxan Yaqub, tərtib edəni və nəşrə hazırlayanı isə Azərbaycan Aşıqlar Birliyinin katibi, “Ozan dünyası” jurnalının baş redaktoru Musa Nəbioğludur.