“ZƏLİMXAN YAQUB: BİBLİOQRAFİYA”

Bu günlərdə “Gənclik” nəşriyyatında Xalq şairi Zəlimxan Yaqubla bağlı yeni kitab işıq üzü görüb.   “Azərbaycanın görkəmli elm və mədəniyyət xadimləri” seriyasından buraxılan “Zəlimxan Yaqub: Biblioqrafiya” adlı bu kitab xalq şairinin həyat və fəaliyyəti haqqında tərtib olunmuş ilk biblioqrafik göstəricidir və 1966-2011-ci illəri əhatə edir.

Z.Yaqub barədə fikir söyləmiş görkəmli şəxsiyyətlərin çıxışlarından və şairin öz yaradıcılığındakı hikmətli sözlərdən seçmələrlə başlayan kitabda aşağıdakı bölümlər var: Əsərləri; Həyat və yaradıcılığı; Redaktə və tərtib etdiyi, ön söz yazdığı kitablar, məsləhətçi və redaksiya heyətində olduğu nəşrlər; Zəlimxan Yaqub dünya mətbuatında; Köməkçi göstəricilər.

Bibilioqrafik göstəricidən istifadəni asanlaşdırmaq üçün burada eyni zamanda “Zəlimxan Yaqubun əsərlərinin əlifba göstəricisi”, “Ədəbi-tənqidi və publisist məqalələrinin əlifba göstəricisi”, “Zəlimxan Yaqub haqqında yazan müəlliflərin əlifba göstəricisi” və “Redaktə və tərtib etdiyi, ön söz yazdığı, məsləhətçi və redaksiya heyətində olduğu nəşrlərin əlifba göstəricisi” adlı köməkçi bölmə də verilib.

Ədəbiyyatşünaslar, xalq yaradıcılığını tədqiq edənlər, kitabxanaçılar, biblioqraflar, ədəbiyyatsevərlər və geniş oxucu kütləsi üçün nəzərdə tutulmuş bu vəsaitin tərtibçi-müəllifləri Şəhla Nağıyeva və Əməkdar mədəniyyət işçisi Xuraman İsmayılova, redaktoru Mədinə Vəliyeva, ön sözün müəllifi Musa Nəbioğludur.

Elşad Çobanlı