Xalq şairi Zəlimxan Yaqubun “Biz niyə sevməyək bir-birimizi”

kitabının və audio diskinin təqdimatı keçirilib

   2011-ci il iyulun 19-da Xalq şairi Zəlimxan Yaqubun bu ilin əvvəlində “Çaşıoğlu” nəşriyyatında nəşr olunan “Biz niyə sevməyək bir-birimizi” kitabı və kitaba əlavə kimi hazırlanıb daxil edilən mahnının audio diskinin təqdimatı keçirilib.

   Xalq şairi Zəlimxan Yaqubun, bəstəkar Sevda Məmmədlinin, əməkdar artist İlqar Muradovun və oranjemançı Əvəz Muradovun ərsəyə gətirdikləri bu audio disk ilk dəfə nümayiş olunub.

   Tədbirin aparıcısı Nərgiz Cəlilova bu layihənin həyata keçirilməsinin xüsusi əhəmiyyət kəsb etdiyindən söz açıb. N. Cəlilova daha sonra sözü əməkdar artist Ağalar Bayramova verib. O da öz növbəsində Zəlimxan Yaqubun müəllifi olduğu şeir parçasını səsləndirərək xalq şairini təbrik edib.

   Təqdimatda iştirak edən Milli Konservatoriyanın rektoru Siyavuş Kərimi, Teatr Xadimləri İttifaqının sədri, xalq artisti Azərpaşa Nemətov, bəstəkar Vaqif Gərayzadə və başqaları səbəbkarı təbrik edənlər sırasında idi.