DEYİMLƏR

İki ömür verilmir təbiətdə heç kəsə,

Səadətdir bir ömrü şərəflə baş vurmaq.

Daşdan çıxan qığılcım kor eyləyər gözləri,

Ağır olur həyatda baltanı daşa vurmaq!

***

Adam var zəhərə döndərir balı,

Zəhəri bal edən dodaqlar da var.

Otuz beş yaşında el ağsaqqalı,

Altmış yaşında uşaqlar da var!

***

Baxıb ögey kimi, baxıb yad kimi,

Balanın qəlbinə dəyə bilərmi?

Dörd fəsil şairə dörd övlad kimi –

Hansını çox sevir, deyə bilərmi?!

***

Gəlhagəl çağıdı bu yerdə yazın,

Gəlin, şeirinizi bu yerdə yazın.

Eşqi dərinlərə qəlbində yer var,

Yaman qənimidir bu yer dayazın.

***

Şimşək çaxdı, dolu döydü qorxmadım,

Baxışların buludundan qorxuram.

İnsaf elə nəğmələrin susmasın,

Dodaqların sükutundan qorxuram.

***

Sevirəm güllərin təbiətini,

Gülün qismətinə bağça, bağ düşüb.

Tikanın bəxtinə çəpərə dönmək,

Qonşunu qonşudan ayırmaq düşüb.