HEYİF

Heyif bu torpağa, heyif bu daşa,

Heyif bu ağaca, heyif bu ota.

Heyif göz oxşayan bu gözəlliyə,

Heyif bu ocağa, heyif bu oda.

Heyif bu torpağın yaşıllığına,

Heyif bu daşların min bir rənginə.

Heyif ağacların verdiyi bara,

Heyif ocaqların od çələnginə.

Heyif yamacların çiçəklərinə,

Heyif dağ çayının şırıltısına.

Heyif xəzəllərin söz-söhbətinə,

Heyif yarpaqların pıçıltısına.

Heyif təbiətdən aralı düşdüm,

Qırıldı yenə də içimdə bir sim.

İnsan olmayanda yan-yörəsində,

Gözəllik yetimdi, təbiət yetim.