ŞUŞADA OXUNAN ŞEİR

Babam qurdu qalasını,

Nişan qoydu sabahına.

Neçə nəsil pənahlandı

Pənah xanın pənahına!

Qanı qarışdı tərinə,

Eşqi kök atdı dərinə.

Dağlar döndü səngərinə

Daşlar döndü silahına!

Kimlər bəzədi kaşımı,

Yeri, göyün nəqqaşımı?

Mən vermərəm bir daşımı

Dünyanın yüz mətahına!

Vurulmasam naxışına,

Həm yazına, həm qışına

Qarşı gəlim qarğışına,

Urcah olum mən ahına!

İşıqlandı ömrü nurda,

Heykəl oldu Vaqif burda,

Bağlanmasa kim bu yurda

Batar elin günahına!

Şir bəslədi hər daş kaha,

Baş əymədi xalqım şaha.

Hər kim düşsə bu iştaha

Şiş batırsın tamahına!

Meydan sular bir imansız,

Dişi qanlı, özü qansız,

Get tapşırdım, ey Allahsız,

Mən səni öz Allahıma!