GÖRÜM

Çayla axar, sellə yarış eylərəm,

Təki səni bir çağlayan bulaq görüm.

Yer üzünü qarış-qarış eləyərəm,

İstəmərəm yaxınları uzaq görüm.

Meydan oxu min çəmənin çiçəyinə,

Yerin, göyün ətri dolsun ürəyinə.

Dağ küləyi qanad versin diləyinə

Varlığında aran görüm, yaylaq görüm.

Dodağında bircə soyuq söz olmasın,

Ürəyinə xəyanətdən iz olmasın.

Elə qayna, baxışların buz olmasın

Hər baxanda gözlərinə ocaq görüm.

Qartal olsam hər gün qoru sardan məni,

Özün çıxart hər sınaqdan, dardan məni.

Özün saxla qasırğadan, qardan məni,

Hər sözündə yollarıma çıraq görüm.

Nə yetirsən yaxşı yetir, əsil yetir,

Gözlərimdə rəngi solmaz fəsil yetir.

Dünya üçün ən vüqarlı nəsil yetir,

Bir kök üstə min bəhrəli budaq görüm!