ŞAİRLƏR EŞİDİR

Həyatda ən şirin şeirə çevirdim

Yuxuda qəlbimə axan səsləri.

Günəşdən torpağın üstünə enib,

Torpaqdan Günəşə qalxan səsləri.

Tanrı öz payından göndərib yerə

Bu xan avazları, bu xan səsləri.

Kamandan eşitdim, sazdan dinlədim

Ruhumu yandırıb-yaxan səsləri.

Haqdan enən səsin səcdəsinə gəl,

Ürəkdə atəşdi, könüldə məşəl.

Şairlər eşidir hamıdan əvvəl

Mələk dodağından çıxan sözləri.