MƏNİ SEVƏ-SEVƏ

ÖLDÜR, İLAHİ!

Sevgidən doğuldum, sevdim, sevildim,

Məni sevə-sevə öldür, İlahi.

Allahın gücünü  sevəndə bildim,

Məni sevə-sevə öldür, İlahi!

Sellərə çevrilim, kükrəyim, axım,

Buluda çevrilim, gurlayım, çaxım,

Ətəkdən boylanım, zirvədən baxım

Məni sevə-sevə öldür, İlahi!

Şirindir sevilən hər gün, hər saat,

Dünya gözəlitək, gəl  mənə naz sat.

Kül olmaq ölümdü, köz olmaq həyat,

Məni sevə-sevə öldür, İlahi!

Çəmənin üstündən əsən meh elə,

Çiçəyin gözündən öpən şeh elə,

İstər nökər elə, istər şah elə

Məni sevə-sevə öldür, İlahi!

Qara saçlarıma sevgi dən olsun,

Mən bir sünbül olum, sevgi dən olsun.

Elə ölümüm də sevgidən olsun,

Məni sevə-sevə öldür, İlahi!

Həvəsim önündə əsrlər azdı,

Eşqimin yanında sular dayazdı,

Məni sevə-sevə yaşatmaq azdı,

Məni sevə-sevə öldür, İlahi!