SUALLAR... SUALLAR
Niyə büdrədi, yıxıldı,
Niyə çox yandı-yaxıldı,
Filankəs niyə paxıldı? –
Allah bilən məsləhətdi.
Üstündəki o yun nədi,
Quzu nədi, qoyun nədi,
Bu qurulan oyun nədi? –
Allah bilən məsləhətdi.
Kim öz içinə qısıldı,
Kim asdırdı, kim asıldı,
Pəhləvan niyə basıldı? –
Allah bilən məsləhətdi.
Kim hürəndi, kim ulayan,
Kimdi bu quyruq bulayan,
Kimlərdi meydan sulayan? —
Allah bilən məsləhətdi.
Niyə çürüyür kökümüz,
Niyə tərpənmir tükümüz,
Niyə ağırdı yükümüz? –
Allah bilən məsləhətdi.
Niyə gözdən axır yaşlar,
Niyə göydən yağır daşlar,
Niyə kəsmir bu savaşlar? –
Allah bilən məsləhətdi.
Səhralıqdı, çəmənlikdi,
Kim unluqdu, kim dənlikdi,
Nə sənlikdi, nə mənlikdi, —
Allah bilən məsləhətdi.
Çoxunu vurub dişinə,
Çoxunu qatıb döşünə,
Qarışma onun işinə, —
Allah bilən məsləhətdi.
Sevinc bilməz ah biləni,
Nökər duymaz şah biləni,
Kim bilər Allah biləni? —
Allah bilən məsləhətdi.
27.VII.2005
|