DÜNYA GÖZƏLİNDİ,

GÖZƏLLİYİNDİ

Dağların döşündə açan gülə bax,

Dünya gözəlindi, gözəlliyindi.

Bir könül istəsən,min könülə bax,

Dünya gözəlindi, gözəlliyindi.

Qayası hündürdü, çəkisi ağır,

Yer göyün üzünü süd kimi sağır.

Bir gün Günəş doğur, bir gün qar yağır,

Dünya gözəlindi, gözəlliyindi.

Yayılır hər kəndin, şəhərin üstə,

Hər gün səhər gəlir səhərin üstə.

Atın, üzənginin, yəhərin üstə,

Dünya gözəlindi, gözəlliyindi.

Sənindi, mənimdi çörəyi, suyu,

Zövqü, ehtirası, bayramı, toyu.

İncə gözəlliyin qoynunda uyu,

Dünya gözəlindi, gözəlliyindi.

Ağası, nökəri, bəyi, xanı var,

Gözəllik uğrunda çıxan canı var.

Nə qədər bu yurdun Zəlimxanı var,

Dünya gözəlindi, gözəlliyindi.