MƏN BİLİRƏM

Füzuli tək axşam-sabah

yanmaq nədi,mən bilirəm!

Sabir kimi oyalanmaq

nə deməkdi,mən bilirəm!

Tarix soydu, qəbrə qoydu

Nəsimini soyanları,

Xəyanətdən mayalanmaq

nə deməkdi,mən bilirəm!

Qəbir yeri Sibir olan

Cavid kimi bir nəhəngi

ləkələmək, sonalamaq

nə deməkdi,mən bilirəm!

Əlli yaşda niyə döndü,

xərçəng oldu

böyük Vurğun,

Dərddən, qəmdən mayalanmaq

nə deməkdi mən bilirəm!

Qara Müşfiq bir güllənin

güdazına qurban getdi,

Paxıllığın, rəzilliyin

mənasını mən bilirəm!

Bu dünyada nələr varsa,

 dünyasını  mən bilirəm!

Məmməd Araz, Xəlil Rza,

Əli Kərim hanı indi,

Oğulsansa indi baş aç,

şeytanları tanı indi.

“Sözlərimin bir parasın

saxlamışam, xəlvətdədi”,

deyən kişi,

“Zəmanə müxənnət olub,

söz indi müxənnətdədi”,

deyən kişi!

Şeytanlardı əyən işi!

Şairlərin taleyidi,

yana-yana külə dönür,

Axır bir gün el ağzında

pardaqlanır, gülə dönür!