BORÇALI AŞIQLARININ III QURULTAYINA
Hörmətli Qurultay iştirakçıları! Xalqımızın min illərlə formalaşan ozan-aşıq sənətini həmişə diri və duru saxlayan ozanlarımız!
Azərbaycan aşıq sənətində Borçalı aşıq məktəbinin özünəməxsus yeri var. Bu məktəbin xalq içində, el arasında Lələ, Dədə, Ozan, Ustad, tərbiyəçi adını çox böyük şərəflə daşımış, bu adlara şərəf və nüfuz gətirmiş Şair Ağacan, Nəbi Faxralı, Sadıq Sultanov, Xındı Məmməd, Əmrah Gülməmmədov, Hüseyn Saraçlı, Kamandar Əfəndiyev və digərləri kimi ustad aşıqlarımızın sənət yolu bu gün gənclər tərəfindən uğurla davam etdirilir.
Bu gün Oğuz xandan oxuya-oxuya Oğuzlaşan, Dədə Qorquddan oxuya-oxuya Dədələşən, Koroğludan oxuya-oxuya Koroğlulaşan böyük sənətkarlar ordusu yetişməli, Borçalı aşıq məktəbinin çoxəsrlik tarixi ənənəsi yaşadılmalıdır. Bunu bizdən Vətənin, millətin, iki müstəqil qardaş ölkənin tələb edir. Aşıqlarımız qəhrəmanlığa, döyüşə, mübarizəyə, ədəbə, mərifətə, mədəniyyətə çağıran, milli birliyimizə, Azərbaycanla Gürcüstanın dostluğunun daha da möhkəmlənməsinə kömək edən böyük sənət möcüzələri yaratmalıdırlar.
Bu gün bizim bu böyük sənət qarşısında vəzifəmiz ondan ibarətdir ki, folklorumuza, şifahi xalq ədəbiyyatımıza, sazımıza, sözümüzə sahib olmağı bacaraq. Bunun üçün gəlişigözəl söz deməklə məsələ həll olunmur. Ozan-aşıq birliyinin fəaliyyəti ilə bağlı yeni bir ruhla işə başlamalıyıq. Milli şüurumuzu, milli təfəkkürümüzü, dilimizin saflığını, ozan yaradıcılığımızı, musiqi folklorumuzu göz bəbəyi kimi qorumaq və bərpa etmək, itirilmiş mənəvi dəyərlərimizi geri qaytarmaq hər birimizin ən böyük vətəndaşlıq vəzifəmizdir.
Hörmətli Qurultay iştirakçıları! Səhhətimlə əlaqədar olaraq sizinlə bir yerdə olmasam da, təkcə Gürcüstanda yaşayan soydaşlarımız üçün deyil, bütövlükdə Azərbaycan xalqının, Azərbaycan mədəniyyətinin tarixi taleyi və tərcümeyi-halı üçün bu günkü qurultayı böyük əhəmiyyətə malik olan bir hadisə kimi qiymətləndirirəm. Ona görə tarixi hadisə deyirəm ki, neçə min illik yaddaşa, kökə, tarixə, zənginliyə malik olan ozan-aşıq sənəti ilə bağlı son illərdə sözün böyük mənasında dövlət səviyyəsində mühüm tədbirlər həyata keçirilir. Azərbaycan Prezidenti İlham Əliyev cənablarının çoxşaxəli və səmərəli fəaliyyəti, çox hörmətli millət vəkili, Heydər Əliyev Fondunun prezidenti Mehriban xanım Əliyevanın bütün sahələrdə olduğu kimi, musiqi mədəniyyətimizə, muğamlarımıza və saza olan böyük qayğısı sayəsində 2009-cu ildə aşıq sənəti YUNESKO-nun qeyri-maddi mədənə irs üzrə siyahısına daxil edildi. Və mən inanıram ki, bu Qurultay da Borçalıda aşıq sənətinin bundan sonrakı inkişafında mühüm əhəmiyyət kəsb edəcək, keyfiyyətcə yeni bir mərhələnin başlanğıcı olacaqdır. Azərbaycan Aşıqlar Birliyi Borçalı aşıqlarına daim qayğı və diqqət göstərib və bu iş bundan sonra da uğurla davam etdiriləcəkdir.
Bir daha Qurultayın işinə uğurlar diləyir və üzümü sənətkarlarımıza tutub deyirəm:
Sazınız susmasın, telləriniz paslanmasın, simləriniz qırılmasın, təzənəniz sınmasın, barmaqlarınız pərdələrdən ayrılmasın! Oxuyun bu millət üçün, oxuyun bu təbiət üçün, oxuyun sənət üçün, oxuyun əbədiyyət üçün!!!
Zəlimxan Yaqub,
Azərbaycan Aşıqlar Birliyinin sədri,
Xalq şairi.
18.03.2012
|